Mi quande passo in Circonvallaçion
vedendote me piggia n'emoscion
pensando a tutta a stöia
che con n'alon de glöia
a te circonda!
Castello de Ciävai!
pä che ti parli a-o cheu de chi t'ammìa
con anscia, con amô, con nostargia
de quelli tempi quande e castellann-e
stavan ai tô barcoin de settemann-e
recammando e pregando, o Croxòu aspëtando.
Ti dominavi austëo co-o portamento fëo
t'ëi da nostra contrâ
sentinella Croxâ!
Castello de Ciävai!
maestöso into teu cô marron grixo
Mazzini, Garibaldi e Nino Bixio t'han saluòu passando,
all'Italia pensando.
Antigo castello
che inte neutti de lunn-a ti te spëgi
mi te salùo insemme coi mae vëgi.
Ciao castello do mae cheu!
Domenico Bancalari